اسلام آباد : پاڪستان ڊيموڪريٽڪ موومينٽ(پي ڊي ايم) جي پارٽين ڊي چوڪ اسلام آباد ۾ ڌرڻي جي درخواست جمع ڪرائي ڇڏي آهي.ڊپٽي ڪمشنر کي جمع ڪرايل درخواست ۾ چيو ويو آهي ته اسلام آباد ڊي چوڪ ۾ اجتماع صبح جو 10 وڳي ٿيندو. ان ڪري ڌرڻي جي اجازت ڏني وڃي.درخواست ۾ اهو به چيو ويو آهي ته ڌرڻي جي حوالي سان سيڪيورٽي ۽ ٽريفڪ جا انتظام به مڪمل ڪيا وڃن. پي ڊي ايم ۾ شامل پارٽين جي مقامي تنظيمن جو چڪ شهزاد ۾ اجلاس ڪوٺايو ويو جنهن ۾ فيصلو ڪيو ويو ته اسلام آباد کان ڪارڪن ڌرڻي ۾ وڌ کان وڌ شرڪت ڪن. پرامن احتجاج ۾ وڌ کان وڌ ڪارڪن شامل ٿين.واضح رهي ته جمعيت علماءِ اسلام ۽ پي ڊي ايم جي سربراهه مولانا فضل الرحمان قوم کي سومر جي ڏينهن سپريم ڪورٽ ٻاهران پرامن احتجاج ۾ شرڪت لاءِ پهچڻ جي هدايت ڪئي آهي.مسلم ليگ(ن) ۽ پيپلز پارٽي ڀرپور طريقي سان شرڪت جو اعلان ڪيو آهي. البته عوامي نيشنل پارٽي(اي اين پي) احتجاج ۾ شرڪت نه ڪندي.ٻئي طرف اسلام آباد ۾ قلم 144 به لاڳو آهي جڏهن ته اهم جڳهين ۽ عمارتن جي سيڪيورٽي لاءِ فوج اڳ ئي مقرر آهي. ضلعي انتظاميه جي ذريعن موجب قلم 144 لاڳو هجڻ سبب احتجاج جي اجازت نٿي ڏئي سگهجي.
60
