پاڪستان ٽِين ٽي ٽوئنٽي ميچ ۾ نيوزيلينڊ کي 9 وڪيٽن تان شڪست ڏئي ڇڏي. آڪلينڊ ۾ کيڏيل ميچ ۾ پاڪستان ٽاس کٽي نيوزيلينڊ کي پهريان بيٽنگ ڪرڻ جي دعوت ڏني. نيوزيلينڊ جي ٽيم 20 هين اوور ۾ 204 رنسن تي آل آئوٽ ٿي وئي. مارڪ چيمپمين 94 رنسون ٺاهي ٽاپ اسڪورر رهيو، ٻين رانديگرن ۾ مائيڪل بريسويل 31 ۽ ٽِم سيفرٽ 19 رنسون ٺاهي آئوٽ ٿيا. پاڪستان طرفان حارث رئوف 3، شاهين شاهه آفريدي، ابرار احمد ۽ عباس آفريدي 2-2 وڪيٽون ورتيون، جڏهن ته شاداب خان جي حصي ۾ هڪ وڪيٽ آئي. نيوزيلينڊ جي 205 رنسن جي جواب ۾ پاڪستاني ٽاپ آرڊر شاندار ڪارڪردگي جو مظهارو ڪيو. اوپنر محمد حارث شروع کان ئي جارحاڻو انداز اختيار ڪيو ۽ 20 بالن 41 رنسون ٺاهي آئوٽ ٿيو، جڏهن ته 22 ورهين جي حسن نواز زبردست بيٽنگ ڪندي 44 بالن تي سينچري مڪمل ڪئي ۽ اهڙي طرح هو پاڪستان طرفان سڀ کان تيز ٽي ٽوئنٽي سينچري ڪندڙ بيٽر بڻجي ويو. ڪپتان سلمان علي آغا به 31 بالن تي 51 رنسن جي ناقابلِ شڪست اننگز کيڏي پاڪستان کي نوَ وڪيٽن تان فتح ڏيارڻ ۾ اهم ڪردار ادا ڪيو. شاندار سينچري اسڪور ڪرڻ تي حسن نواز کي پليئر آف دي ميچ قرار ڏنو ويو. ٽِين ميچ لاءِ پاڪستاني ٽيم ۾ عباس آفريدي ۽ ابرار احمد کي شامل ڪيو ويو، جڏهن ته محمد علي ۽ جهانداد خان کي ڊراپ ڪيو ويو. ياد رهي ته پنجن ميچن جي سيريز ۾ هنيئر تائين ٻن ميچن ۾ نيوزيلينڊ ۽ هڪ ۾ پاڪستان ڪاميابي حاصل ڪئي آهي، سيريز جي چوٿين ميچ 23 مارچ، آچر جي ڏينهن مائونٽ مائونٽ مينگنوئي ۾ کيڏي ويندي.
11
