بيٽنگ هلي نه بالنگ: پاڪستان کي چوٿين ٽي ٽوئنٽي ميچ ۾ شڪست، نيوزيلينڊ سيريز پنهنجي نالي ڪري ورتي

 پنج ٽي ٽوئنٽي ميچز جي سيريز جي چوٿين ميچ ۾ نيوزيلينڊ پاڪستان کي 115 رنسن تان شڪست ڏئي سيريز پنهنجي نالي ڪري ورتي.  پاڪستان ٽاس کٽي پهريان فيلڊنگ جو فيصلو ڪيو جيڪو شاهينن لاءِ فائديمند ثابت نه ٿيو، نيوزيلينڊ پهريان کيڏندي پاڪستان بالرز جون متيون منجهائي ڇڏيون، ميزبان ٽيم پهريان بيٽنگ ڪندي مقرر 20 اوورز ۾ 6 وڪيٽن جي نقصان تي 220 رنسون ٺاهيون، نيوزيلينڊ طرفان فن ايلن 50 رنسون ٺاهي ٽاپ اسڪورر رهيو. ٽم سائفرٽ 44، مارڪ چمپسن 24 ۽ ڊيرل مچل 29 رنسون ٺاهيون. اهڙي طرح جمي نيشم ۽ مچل هاءِ 3، 3 رنسون ٺاهي پويلين موٽي ويا، جڏهن ته مائيڪل بريسويل 46  ۽ زاڪري فاڪس 3 رنسون ٺاهي ناٽ آئوٽ رهيا. پاڪستان طرفان حارث رئوف 3، ابرار احمد ۽ عباس آفريدي هڪ رانديگر کي آئوٽ ڪيو. جڏهن ته شاهين آفريدي  ڪابه وڪيٽ نه وٺي سگهيو، شاهين آفريدي ۽ شاداب خان ڪابه وڪيٽ وٺڻ کان سواءِ 49-49 رنسن جي عيوض مهانگا ترين بالر ثابت ٿيا. حدف حاصل ڪرڻ لاءِ راند شروع ٿيندي ئي پاڪستاني ٽيم(تون هل مان اچان ٿو) جو عملي نمونو بڻجي وئي پاڪستان جا 9 رانديگر ڊبل فگر ۾ به داخل نه ٿي سگهيا صرف عبدالصمد 44 ۽ عرفان خان 24 رنسون ٺاهيون. اوپنر محمد حارث 2، حسن نواز، ڪپتان سلمان آغا عباس آفريدي ۽ شاداب خان هڪ، هڪ رنس ٺاهي واپس روانا ٿيا، جڏهن ته خوشدل شاهه ۽ حارث رئوف 6-6، ابرار احمد هڪ رنس ٺاهي پويلين موٽي ويا. پاڪستان جي سموري ٽيم 18هين اوور ۾ 105 رنسون ٺاهي آئوٽ ٿي وئي، نيوزيلينڊ پاڪستان کي شڪست ڏئي سيريز پنهنجي نالي ڪري ورتي.