“عيد جي خوشين ۾ سوڳ: شهيد جان محمد مهر جي گهر ۾ انصاف جو مطالبو”

پريالوءِ :سنڌ جي سڃاتل صحافي شهيد جان محمد مهر جي گهر ۾ هن ڀيري عيد جون خوشيون نه ٿيون، بلڪه هر طرف ويراڻي ۽ سوڳ هو. گهر جا دروازا عيد جي مبارڪن لاءِ بند، ۽ شهيد جي معصوم نياڻين فزا ۽ ناياب جون اکين ۾ لڙڪ—سوال هو ته سندن بابا کي ڪنهن ڏوهه ۾ شهيد ڪيو ويو. جان محمد مهر کي بيدرديءَ سان قتل ڪيو ويو، پر اڃا تائين جوابدارن کي سزا نه ملي سگهي. وارثن جو چوڻ آهي ته قانون جي دير انصاف کان انڪار برابر آهي. “اسان کي عيد تي نوان ڪپڙا نه کپي، اسان کي انصاف کپي!” شهيد جي نياڻين جو هيءَ پُڪار اقتدار جي ڪرسيءَ تي ويٺل اختيارين کي ٻُڌڻ گهرجي. سنڌ جي صحافتي برادري، انساني حقن جي تنظيمن ۽ سڄاڻ ڌرين پڻ هڪ ڀيرو ٻيهر مطالبو ڪيو آهي ته شهيد جان محمد مهر جي قتل ڪيس کي جلد کان جلد حل ڪري، وارثن کي انصاف فراهم ڪيو وڃي. عيد تي سوڳ وارو ماحول ڄڻ ته سنڌ جي آزاديءَ سان جڙيل صحافين لاءِ هڪ پيغام هو ته حق سچ چوڻ جي قيمت اڃا به رت سان ادا ڪرڻي پوي ٿي.