بلوچستان نيشنل پارٽي(مينگل) مستونگ ۾ لڪ پاس تي 6 ڏينهن کان ڌرڻو جاري آهي. لڪ پاس تي ڌرڻي سبب ڪراچي، ڪوئٽه ۽ تفتان روڊ تي ٽريفڪ معطل آهي. تحريڪ انصاف جو وفد بي اين جي ڌرڻي ۾ پهتو جنهن ۾ سلمان اڪرم راجا، علامه راجه ناصر عباس ۽ ٻيا صوبائي اڳواڻ شامل هئا. بي اين پي جي سربراهه اختر مينگل عورتن جي آزادي تائين احتجاجي ڌرڻو جاري رکڻ جو اعلان ڪيو ۽ چيو ته عورتن جون آئين کان مٿانهيون گرفتاريون قبول نه آهن، ٻن ڏينهن ۾ عورتن کي آزاد نه ڪيو ويو ته ڪوئٽه طرف مارچ ڪنداسين. هن چيو ته ڳالهين جي لاءِ حڪومتي وفد آيو هو، بي اختيار بلوچستان حڪومت ٻئي هنڌ ڏسي رهي آهي، جنهن کان پوءِ بي اين پي سربراهه اختر مينگل ڪوئٽه لانگ مارچ جو اعلان ڪري ڇڏيو ۽ چيو ته حڪومت کي ڏنل ڊيڊ لائن ختم ٿي وئي آهي انهي ڪري ڌرڻي ۾ شرڪت ڪندڙ سڀاڻي ڪوئٽه طرف لانگ مارچ ڪنداسين. ٻئي طرف بي اين پي قافلي کي ڪوئٽه ۾ داخلا کان روڪڻ لاءِ انتظاميه طرفان قدم کنيا پيا وڃن، قومي شاهراهه لڪپاس ۽ دشت ۾ مختلف هنڌن تي خندقون کوٽيون پيون وڃن، مستونگ ۽ مختلف هنڌن کي ڪنٽينرز لڳائي سيل ڪيو پيو وڃي. ياد رهي ته گذريل ڏينهن سردار اختر مينگل جي قيادت ۾ بي اين پي جو لانگ مارچ وڊهه کان شروع ٿيو هو پر مستونگ جي هنڌ تي رستا بند ٿيڻ تي ساڳئي هنڌ ڌرڻو هنيو ويو هو.
10
