قومي اسيمبلي ۾ اپوزيشن اڳواڻ عمر ايوب الزام لڳايو آهي ته عمران خان کي عيد جي نماز به پڙهڻ نه ڏني وئي، اسان ڪهڙي اسلامي ملڪ پاڪستان ۾ رهي رهيا آهيون جتي پي ٽي آءِ باني کي عيد جي نماز به پڙهڻ نه ڏني وئي. اڊيالا جيل جي ٻاهران صحافين سان ڳالهيون ڪندي عمر ايوب چيو ته اسان کي عدالتي حڪم جي باوجود باني سان ملاقات نه ڪرڻ ڏني وئي، خميس جي ملاقات جي لسٽ باني پاڻ فائنل ڪري وڪيلن جي حوالي ڪندو آهي، هن چيو ته خبر ناهي ڪنهن جي چوڻ تي ملاقات جي اجازت نه پئي ڏني وڃي، باني جي اڍائي مهينن کان ٻارن سان به ڳالهائڻ جي اجازت ناهي ڏني وئي، ڀينرن سان به ملاقات نه پئي ڪرڻ ڏني وڃي. هن الزام لڳائيندي چيو ته حد ته اها آهي جو پي ٽي آءِ باني کي عيد جي نماز به پڙهڻ نه ڏني وئي، اسان ڪهڙي اسلامي ملڪ ۾ رهي رهيا آهيون جتي باني کي عيد جي نماز به پڙهڻ نه ڏني وئي ته هاڻ باقي ڇا رهجي ويو آهي. هن چيو ته هي هر ڀيري توهين عدالت ڪري رهيا آهيون، اميد ڪريون ٿا ته جج صاحب پنهنجن حڪمن تي عمل ڪرائيندا، جيڪڏهن ججز پنهنجن حڪمن تي عمل نه ڪرائي سگهيا ته بهتر آهي ته استعيفيٰ ڏئي گهر هليا وڃن، اسان جو وفد بلوچستان ويل آهي، وڏي مشڪلن سان اهو اختر مينگل جي قافلي سان وڃي مليو.
8
