پاڪستان پيپلز پارٽي جي سينٽرل ايگزيڪٽو ڪميٽي (سي اي سي) جو اهم اجلاس ٿيو، جنهن ۾ پنجاب حڪومت جي رويي تي شديد خدشن جو اظهار ڪيو ويو۔اجلاس جي صدارت صدر آصف علي زرداري ڪئي، جنهن ۾ ٻوڏ سبب ٿيل نقصان، خطي جي ڇڪتاڻ ۽ پنجاب جي سياسي صورتحال تي تفصيلي ڳالهه ٻولهه ڪئي وئي۔ اجلاس دوران (ن) ليگ جي قيادت سان آصف علي زرداري ۽ بلاول ڀٽو زرداري جي حاليه ملاقاتن بابت به غور ڪيو ويو، جڏهن ته شرڪت ڪندڙن کي حڪومت سان ڳالهين ۾ ٿيل اڳڀرائي کان آگاهه ڪيو ويو۔ذريعن موجب اجلاس ۾ قانوني، پارلياماني ۽ آئيني معاملن تي تفصيلي بريفنگ ڏني وئي ۽ ڄاڻايو ويو ته (ن) ليگ سان ڪيترن ئي حل طلب معاملن تي اڳڀرائي ٿي آهي۔ اجلاس دوران وزيراعظم شهباز شريف سان ٿيل ملاقات ۾ مختلف اهم سياسي ۽ انتظامي مسئلن تي ٿيل ڳالهين بابت به شرڪت ڪندڙن کي آگاهه ڪيو ويو۔آزاد ڪشمير حڪومت جي حوالي سان (ن) ليگ سان ٿيل ڳالهين ۽ مختلف آپشنز تي به غور ڪيو ويو۔ ذريعن موجب پيپلز پارٽي جي ڪيترن ئي اڳواڻن پنجاب جي انتظامي ۽ حڪومتي رويي تي خدشا ظاهر ڪيا، سندن چوڻ هو ته پنجاب ۾ پيپلز پارٽي کي فيصلا سازي ۽ مشاورت ۾ شامل نه پيو ڪيو وڃي۔ان موقعي تي پنجاب جي اڳواڻن ٻوڏ کان اڳ ۽ بعد جي انتظامي صورتحال بابت تفصيلي رپورٽ سي اي سي اجلاس ۾ پيش ڪئي۔
