اسلام آباد: آرمي چيف، چيف آف ڊفينس فورسز فيلڊ مارشل سيد عاصم منير سان ترڪي جي چيف آف جنرل اسٽاف، جنرل سلجوق بيرقدار اوغلو جي ملاقات ۾ ٻنهي ملڪن جي دفاعي ۽ عسڪري تعلقات کي وڌيڪ مضبوط ڪرڻ تي زور ڏنو ويو.
آءِ ايس پي آر موجب، جنرل بيرقدار جڏهن هيڊ ڪوارٽر پهتا ته انهن کي پاڪستاني هٿياربند فوج پاران گارڊ آف آنر پيش ڪيو ويو. ملاقات دوران گڏيل دلچسپي جي معاملن، خطي ۽ عالمي سيڪيورٽي صورتحال تي تفصيلي خيالن جو اظهار ڪيو ويو. ٻنهي ڌرين پاڪستان ۽ ترڪي جي وچ ۾ دفاعي ۽ عسڪري تعاون کي وڌائڻ جا امڪان بحث هيٺ آيا، ۽ موجوده مثبت تعلقات تي اطمينان جو اظهار ڪيو ويو.
فيلڊ مارشل سيد عاصم منير چيو ته پاڪستان ۽ ترڪي جا پراڻا ڀائراڻا تعلقات گڏيل تاريخ، اعتماد ۽ عوامي رابطا تي ٻڌل آهن. جنرل بيرقدار اوغلو به پاڪستاني هٿياربند فوج جي پيشه وارانه صلاحيتن ۽ نظم وضبط جي تعريف ڪئي، ۽ تربيت، گڏيل فوجي مشقن ۽ استعداد وڌائڻ جي شعبن ۾ وڌيڪ تعاون جو اظهار ڪيو.
انهيءَ ملاقات کان علاوه، ترڪي جي چيف آف جنرل اسٽاف دفاع واري وزير خواجه محمد آصف سان به ملاقات ڪئي. ٻنهي ڌرين تاريخي دوستانه لاڳاپن ۽ ڀائراڻا تعلقات کي مضبوط ڪرڻ جو عزم ظاهر ڪيو. ترڪي جي نمائندي پاڪستان جي خطي ۾ امن ۽ استحڪام ۾ ڪردار جي ساراهه ڪئي، ۽ افغانستان سميت علائقائي امن ۽ استحڪام لاءِ گڏيل ڪوششن تي زور ڏنو.
