سنڌ کي ٽڪرا ٽڪرا ڪرڻ جي سازشن، زمينن تي قبضن ۽ پاڻي جي ھٿرادو کوٽ خلاف عوامي تحريڪ جو احتجاج نئيو اختيار ڪري ويو آھي. عوامي تحريڪ پاران جاري سجاڳي مھم جي سلسلي ۾ پريس ڪلب نئون ڪوٽ کان ڍورو بازار چوڪ تائين ھڪ شاندار ۽ پروقار احتجاجي ريلي ڪڍي وئي، جنھن کان پوءِ ڪارڪنن ڌرڻو ھڻي ويھي رھيا.ھن احتجاجي ريلي ۽ ڌرڻي ۾ پارٽي ڪارڪنن، ھارين، مزدورن، نوجوانن ۽ شھرين وڏي انگ ۾ شرڪت ڪئي. مظاھرين سنڌ جي ٻيٽن، زمينن ۽ قدرتي وسيلن جي بچاءَ لاءِ فلڪ شگاف نعريبازي ڪئي ۽ پنھنجي حقن جي مڪمل حاصلات تائين جدوجھد جاري رکڻ جو عزم ورجايو.ڌرڻي کي خطاب ڪندي عوامي تحريڪ جي مرڪزي ۽ مقامي اڳواڻن چيو تھ ڪارپوريٽ فارمنگ جي نالي تي سنڌ جون لکين ايڪڙ زرخيز ۽ تاريخي زمينون ھارين کان کسي غير مقامي ڪمپنين کي ڏيڻ واري رٿا ڪنھن بھ صورت قبول نھ ڪئي ويندي. ھنن چيو تھ سنڌ جي زراعت اڳ ئي پاڻي جي سخت کوٽ سبب تباھي ڪناري پھتل آھي ۽ نيون رٿائون مقامي آبادگارن لاءِ معاش موت برابر آھن.مقررين وڌيڪ چيو تھ ارسا پاران سنڌ سان پاڻي ورھائڻ ۾ مڪمل ڏاڍائي ڪئي پئي وڃي، جنھن ڪري صوبي جي پڇڙي جا ضلعا مڪمل بنجر بڻجي چڪا آھن. پيئڻ جي پاڻي سميت فصلن لاءِ درياھي پاڻي نھ ملڻ سبب آبادگار، ھاري ۽ پورھيت بدترين فاقاڪشي واري زندگي گذارڻ تي مجبور آھن.اڳواڻن نشاندھي ڪئي تھ عوامي تحريڪ جو احتجاج دراصل سنڌ جي وجود، وحدت ۽ وسيلن جي تحفظ لاءِ ھڪ تاريخي مزاحمت آھي. موجودھ مھانگائي ۽ بيروزگاريءَ عام ماڻھوءَ جو جيئڻ عذاب بڻائي ڇڏيو آھي، جڏھن تھ حڪمران عوامي مسئلا حل ڪرڻ بجاءِ وسيلن جي لٽ مار ۾ مصروف آھن.مقررين حڪومت کان مطالبو ڪيو تھ ڪارپوريٽ فارمنگ جا سڀ فيصلا ترت رد ڪيا وڃن، سنڌ جو جائز پاڻي وارنٽي موجب ڏنو وڃي ۽ تاريخي جاگرافيائي حدن تي ڪنھن بھ ريت قبضو قبول نھ ڪيو ويندو. ھنن چتاءُ ڏنو تھ جيڪڏھن سنڌ دشمن منصوبا واپس نھ ورتا ويا تھ عوامي تحريڪ جو احتجاج سموري صوبي جي ڪنڊ ڪڙڇ ۾ پکڙجي ويندو.
