سکر : پاڪستان پيپلزپارٽي جي مرڪزي اڳواڻ ۽ وفاقي وزير سيد خورشيد احمد شاهه چيو آهي ته هو جلد وفاقي ڪابينا ۾ تجويز پيش ڪندو ته ملڪ ۾ سرڪاري ملازمن جي پگهارن ۾ 30 کان 35 سيڪڙو اضافو ڪيو وڃي ۽ مزدور جي پگهار به 35 هزار هجڻ گهرجي اهڙن خيالن جو اظهار هن سکر ۾ ضلعي ڪائونسل هال جي بلڊنگ جي افتتاحي تقريب کي خطاب ڪندي ڪيو، افتتاحي تقريب ۾ ايڊمنسٽريٽر ضلعي ڪائونسل سکر اعجاز احمد پلهه، ڊپٽي ڪمشنر سکر شهزاد طاهر ٿهيم،چيف آفيسر سيد اڪبر علي شاھ ، يونين اڳواڻ عبدالمجيد جسڪاڻي، پ پ سٽي سکر صدر مشتاق سرهيو، اڳوڻو ضلعي ناظم سردار تقي خان ڌاريجو، سيد قاسم علي شاهه، اڳوڻو ڊپٽي ميئر طارق چوهاڻ ۽ ٻين معززين شرڪت ڪئي، سيد خورشيد احمد شاهه وڌيڪ چيو ته مهانگائي کي نظر ۾ رکندي مزدور جي پگهار به 35000 ڪرڻ گھرجي، هن وڌيڪ چيو ته شهيد ذوالفقار علي ڀٽي عوام کي اهو حق ڏنو ته هو هڪ پرچي سان مستقبل تبديل ڪرڻ جو حق ڏنو ان دور ۾ جيل۔ڪوڙا ۽ ڦاهيون کائي جمهوريت کي مظبوط ڪيو پر هاڻي ادارن جي ٽڪراءُ، سياسي قوتن کي سوچڻو پوندو، جيڪڏهن اسان پارليامينٽ کي طاقتور نه بڻايو ته عوام ڪڏهن به طاقتور نه ٿي سگهندو ۽ ملڪ جا 4 سيڪڙو سيڙپڪار 96 سيڪڙو عوام تي حڪمراني ڪرڻ لڳندا. هنن جو فرض آهي ته عوام کي مضبوط ڪري کين کارايو ۽ سندن مسئلا حل ڪن، هنن چيو ته تعليم جو رستو ترقي جو رستو آهي ۽ جهالت جو رستو تباهي طرف وٺي وڃي ٿو، اچو ته قوم کي ترقي پسند بڻائڻ نٿا چاهيون. چوڪيدار هجي يا پٽيوالا، ملڪ ۾ مهانگائي سبب عوام جو جيئڻ جنجال بڻجي ويو آهي، ملڪ جو پورهيت طبقو مهانگائي کان سڀ کان وڌيڪ متاثر ٿي رهيو آهي، هن چيو ته اسان جي ذميواري رڳو ووٽ وٺڻ يا گپ شپ ڪرڻ ناهي، اسان جو ڪم آهي. ملڪ ۽ علائقي جي تعمير ۽ ترقي ڪريون، هنن چيو ته اسان عوام کي جيڪو ڪجهه ڏنو آهي اهو اسان جي پارٽي ڀٽو شهيد ۽ بينظير ڀٽو شهيد جو تحفو آهي، مان اندران ۽ ٻاهران به صاف آهيان.هن چيو ته سکر سنڌ جو تاريخي شهر ۽ ضلعو آهي. سنڌ جي انهن ضلعن ۾ شمار ٿئي ٿو جتي سموريون سهولتون موجود آهن، اسان سکر ۾ ڪيتريون ئي اسپتالون ٺاهيون آهن، هتي جي ماڻهن کي ليور ٽرانسپلانٽ لاءِ هندستان وڃڻو پوندو هو ۽ هن وقت هتي مفت علاج ڪيو پيو وڃي، پيپلز پارٽي جي حڪومت دوران سکر ۾ 5 کان 6 اسپتالون قائم ڪيون آهن. سکر ۾ يونيورسٽيون آھن جڏهن ته ڪامسيٽ يونيورسٽي سکر ۾ ٺاهي پئي وڃي.
