عوامي مسلم ليگ جي سربراهه شيخ رشيد احمد چيو آهي ته سندس ڀائٽيو شيخ راشد شفيق ڪڏهن به فيصل آباد نه ويو، پوءِ به کيس 9 مئي جي واقعي جي ڪيس ۾ 10 سال قيد جي سزا ٻڌائي وئي آهي، جيڪو انصاف سان واڳ نٿو رکي. راولپنڊي جي دهشتگردي جي انت واري عدالت جي ٻاهران صحافين سان ڳالهائيندي شيخ رشيد چيو ته، “فيصل آباد ۾ منهنجي ڀائٽي سميت 100 ماڻهن کي 10-10 سال قيد جون سزائون ٻڌايون ويون آهن، جڏهن ته منهنجو ڀائٽيو انهي شهر ۾ ڪڏهن ويو ئي ناهي. ان ڪيس ۾ ڪوبه آزاد گواهه موجود ناهي، سڄو نظام جانبدار بڻجي ويو آهي.” “اسان کي ڪيس وڙهڻ جي اجازت ئي نه پئي ڏني وڃي” شيخ رشيد دعويٰ ڪئي ته “اسان جي وڪيلن کي پيش ٿيڻ نٿو ڏنو وڃي، سڀ گواهه ۽ شاهديون سرڪاري آهن. خدا لاءِ انصاف کي عام ڪيو وڃي.” هن چيو ته جن ڪارڪنن کي سزائون ڏنيون ويون آهن، “انهن جي گهرن ۾ کائڻ لاءِ به ڪجهه نه آهي، انهن جو ڏک ۽ غربت ڏسڻ گهرجي.” “هارين کي بچايو، ڀارت جي آبي جارحيت تباهي آڻي ڇڏي” هارين جي حوالي سان ڳالهائيندي شيخ رشيد چيو ته، “ڀارت جي آبي جارحيت سبب پاڪستان جو هاري تباهه ٿي ويو آهي. حڪومت کي گهرجي ته هارين جي حقيقي معنيٰ ۾ مدد ڪري، خاص ڪري موجوده ٻوڏ واري صورتحال ۾ مهانگائي وڌيڪ وڌندي، غريب اڳ ۾ ئي سخت پريشان آهي، کيس انصاف ڏنو وڃي.**” ياد رهي…فيصل آباد جي دهشتگردي جي انت واري عدالت، 9 مئي 2023ع جي سياسي هنگامي واقعن بابت داخل ڪيسن ۾، تحريڪ انصاف جي اڳواڻن عمر ايوب، شبلي فراز، زرتاج گل، شيخ راشد شفيق سميت 100 جوابدارن کي 10-10 سال قيد جي سزائون ٻڌايون آهن.
