اسرائيلي فوج غزه لاءِ امداد کڻي ويندڙ عالمي قافلي گلوبل صمود فلوٽيلا تي حملو ڪري ڪيترين ئي ٻيڙين کي روڪي ڇڏيو ۽ سوئيڊن جي مشهور ماحولياتي ڪارڪن گريٽا تهنبرگ سميت 200 کان وڌيڪ انساني حقن جا ڪارڪن گرفتار ڪري ورتا.عرب ميڊيا جي رپورٽن موجب، فلوٽيلا جو مقصد غزه ۾ تڪڙي امداد پهچائڻ ۽ انساني بحران کي گهٽائڻ هو، پر اسرائيلي فوج ٻيڙين کي روڪيندي قافلي جي شرڪت ڪندڙن کي گرفتار ڪري مقامي جيلن ڏانهن منتقل ڪيو.گرفتارن ۾ مختلف ملڪن جا سياسي اڳواڻ، انساني حقن جا ڪارڪن، ۽ عالمي صحافي شامل آهن. رپورٽ ۾ چيو ويو آهي ته صرف هڪ ٻيڙي اسرائيلي روڪٿام کان بچي نڪري سگهي.هن واقعي کانپوءِ پوري دنيا ۾ سخت ردعمل سامهون آيو آهي. ڪيترن ئي يورپي ملڪن ۾ ماڻهن سڙڪن تي نڪري اسرائيل جي عمل خلاف مظاهرا ڪيا، جڏهن ته سوشل ميڊيا تي به #FreeTheFlotilla ۽ #GazaUnderAttack جهڙا هئش ٽيگ ٽرينڊ ڪرڻ لڳا.انساني حقن جي تنظيمن اسرائيل جي عمل کي بين الاقوامي قانونن ۽ انساني اصولن جي ڀڃڪڙي قرار ڏيندي عالمي برادري کان سخت نوٽيس وٺڻ جو مطالبو ڪيو آهي.
