پاڪستان ڪرڪيٽ بورڊ (پي سي بي) جي چيئرمين محسن نقوي اعلان ڪيو آهي ته پاڪستان سپر ليگ (پي ايس ايل) جي 11هين سيزن ۾ ٻن نون ٽيمن جي شموليت لاءِ نيلامي جي تاريخ ۾ هڪ هفتي جي واڌ ڪئي وئي آهي، جنهن بعد نيلامي هاڻي 22 ڊسمبر 2025 تي منعقد ڪئي ويندي. محسن نقوي موجب پي ايس ايل جي وڌندڙ عالمي مقبوليت کي نظر ۾ رکندي بڊنگ جي تاريخ وڌائي وئي آهي. پي سي بي موجوده ڇهن فرنچائزز جي قيمتن ۾ لڳ ڀڳ ٽي ڀيرا اضافو ڪيو آهي، جڏهن ته ٻن نون فرنچائزز لاءِ في سال هڪ ارب 30 ڪروڙ رپين جي قيمت مقرر ڪئي وئي آهي، ۽ هاڻي سڀ مالي معاملا پاڪستاني رپين ۾ طئي ڪيا ويا آهن. پي ايس ايل جي ٽيمن جو انگ اٺ ڪرڻ لاءِ راولپنڊي، فيصل آباد، سيالڪوٽ، حيدرآباد، مظفرآباد ۽ گلگت مان ٻه شهر چونڊيا ويندا.
