قومي اسيمبلي جي قائمہ ڪميٽي براءِ خزانه جي اجلاس ۾ انڪشاف ٿيو آهي ته قيامِ پاڪستان کان وٺي هينئر تائين هائوسنگ فنانس تحت صرف 65 هزار ماڻهن کي مجموعي طور تي 246 ارب روپيه قرض ڏنا ويا آهن۔
اجلاس سيد نويد قمر جي صدارت هيٺ ٿيو، جنهن ۾ سيڪريٽري هائوسنگ محمد محمود ڪميٽي کي تفصيلي بريفنگ ڏني۔
سيڪريٽري هائوسنگ چيو ته ملڪ ۾ هائوسنگ فنانس جي واڌ ۾ سڀ کان وڏي رڪاوٽ مارگيج سان لاڳاپيل مؤثر قانونسازي جو نه هجڻ آهي۔ انهن موجب جيڪڏهن قانونسازي نه ڪئي وئي ته ماڻهو گهر ٺاهڻ دوران سخت مسئلن جو شڪار ٿيندا رهندا۔
هن چيو ته حڪومت گهرن جي تعمير لاءِ هر سال 200 کان 300 ارب روپيه تائين سود تي سبسڊي برداشت ڪندي ته جيئن عوام کي آسان شرطن تي قرض ملي سگهي۔
ڪميٽي جي چيئرمين نويد قمر سوال اٿاريو ته ايتري وڏي رقم ڪٿان ايندي؟ جنهن تي هڪ ردعمل دوران هن چيو ته “اسين اڃان به ٻه مختلف دنيائن ۾ رهون پيا.”
ناڻي واري وزير محمد اورنگزيب ڪميٽي کي ٻڌايو ته جڏهن اسڪيم مڪمل رفتار سان هلندي ته ان لاءِ مالي وسيلا پڻ حاصل ڪيا ويندا۔ هن چيو ته هن وقت حڪومت اسڪيم لاءِ 5 ارب روپيه مختص ڪيا آهن ۽ ضرورت پوڻ تي وڌيڪ حل ڪڍيو ويندو۔
سيڪريٽري خزانه موجب هن وقت بجلي سبسڊي ۽ بينظير انڪم سپورٽ پروگرام تي به وڏا خرچ ٿي رهيا آهن، تنهن هوندي به ٻين مدن ۾ ڪٽوتي ڪري هائوسنگ اسڪيم لاءِ وسيلا فراهم ڪري سگهجن ٿا۔
نويد قمر سوال ڪيو ته بئنڪ هن “رسڪي مارڪيٽ” ۾ ڇو ايندا؟ جنهن تي ناڻي واري وزير چيو ته مالي نظام ۾ استحڪام اچڻ ۽ حڪومت طرفان بئنڪن کان قرض گهٽ وٺڻ کان پوءِ بئنڪ هائوسنگ فنانس طرف ايندا۔
