اسلام آباد: نائب وزيراعظم ۽ پرڏيهي وزير اسحاق ڊار چيو آهي ته پاڪستان ۽ برطانيه وچ ۾ واپاري لاڳاپن کي وڌيڪ هٿي ڏيڻ تي اتفاق ڪيو ويو آهي، جڏهن ته عالمي سطح تي پاڪستان جي مثبت ڪردار کي پڻ ساراهيو پيو وڃي. هن چيو ته موجوده حڪومت جي معاشي پاليسين جي ڪري ملڪ ۾ پرڏيهي سيڙپڪاري جا نوان موقعا پيدا ٿي رهيا آهن ۽ دوست ملڪن سان گڏيل سهڪار کي وڌيڪ مضبوط بڻايو پيو وڃي.
پرڏيهي وزير وڌيڪ تفصيل ڏيندي چيو ته وزيراعظم شهباز شريف جي قيادت ۾ پاڪستان جو وقار عالمي برادري ۾ وڌيو آهي. هن وقت وزيراعظم کي سڄي دنيا مان ايتريون گهڻيون دعوتون ملي رهيون آهن جو انهن مان چونڊ ڪرڻ مشڪل ٿي پيو آهي. هي ان ڳالهه جو ثبوت آهي ته عالمي برادري پاڪستان سان پنهنجا لاڳاپا وڌيڪ مضبوط ڪرڻ چاهي ٿي ۽ ملڪي قيادت تي مڪمل اعتماد جو اظهار ڪري رهي آهي.
اسحاق ڊار جو چوڻ هو ته برطانيه سان واپار، سيڙپڪاري ۽ عوامي رابطن کي وڌائڻ لاءِ عملي قدم کنيا پيا وڃن. ٻنهي ملڪن وچ ۾ تاريخي لاڳاپا آهن جن کي هاڻي جديد معاشي گهرجن مطابق وڌيڪ مستحڪم ڪيو ويندو ته جيئن ملڪي معيشت کي وڌيڪ هٿي ملي سگهي ۽ نوجوانن لاءِ روزگار جا نوان موقعا پيدا ٿين.
