راولپنڊي: راولپنڊي پوليس ۾ سخت احتسابي عمل دوران هڪ وڏي ڪارروائي ڪندي، شهريءَ جي منهن تي جتي هڻندڙ پوليس ڪانسٽيبل کي نوڪريءَ مان برطرف ڪيو ويو آهي. سي پي او (CPO) راولپنڊي پاران جاري ڪيل حڪمنامائي موجب، قانون جي خلاف ورزي ڪندڙ ڪنهن به اهلڪار کي معاف نه ڪيو ويندو ۽ پوليس کاتي ۾ ڪاري رڍن خلاف سخت ترين ڪارروائي عمل ۾ آندي ويندي.
ذريعن موجب، ڪجهه ڏينهن اڳ سوشل ميڊيا تي هڪ وڊيو وائرل ٿي هئي، جنهن ۾ مذڪوره ڪانسٽيبل کي هڪ عام شهريءَ سان بدتميزي ڪندي ۽ سندس منهن تي جتي هڻندي ڏٺو ويو هو. ان واقعي جو سخت نوٽيس وٺندي اعليٰ اختيارين فوري طور تي جاچ جو حڪم ڏنو هو، جنهن ۾ ڪانسٽيبل مٿان لڳايل الزام سچ ثابت ٿيا.
راولپنڊي پوليس جي ترجمان جو چوڻ آهي ته پوليس جو بنيادي فرض شهرين جي جان ۽ مال جي حفاظت ڪرڻ سان گڏوگڏ سندن عزتِ نفس جو احترام ڪرڻ آهي. اهڙي قسم جو غير اخلاقي ۽ غير قانوني رويو ڪنهن به صورت ۾ برداشت نه ڪيو ويندو ۽ مستقبل ۾ به اهڙي عمل ۾ ملوث اهلڪارن خلاف سخت کاتي وارو احتساب جاري رهندو.
