اسلام آباد: ملڪي سياسي فضا ۾ طوفاني تبديلين جا پڙاڏا ٻڌڻ ۾ اچي رهيا آهن، جتي پاڪستان پيپلز پارٽي (PPP) ۽ اسٽيبلشمينٽ وچ ۾ نون انتظامي يونٽن ۽ ڪئنالن جي معاملي تان سياسي ڇڪتاڻ انتهائي تيز ٿي وئي آهي. لنڊن ۾ اهم سياسي اڳواڻن جي گڏجڻ کان پوءِ مختلف افواهن جو بازار گرم آهي، جڏهن ته ذريعن موجب وفقي وزير محسن نقوي لنڊن ۾ صدر آصف علي زرداري سان ملاقات ڪري کيس حڪمت عملي تي غور ڪرڻ لاءِ 8 ڏينهن جي مهلت ڏني آهي. پيپلز پارٽي انتظامي يونٽن جي تبديليءَ واري تجويز تي سخت انڪار ڪري ڇڏيو آهي، جنهن بعد سياسي تحرڪن ۾ وڏي تيزي اچڻ جو امڪان ظاهري ٿي رهيو آهي.
ٻئي طرف مسلم ليگ (N) جي قيادت پردي پويان صورتحال جو جائزو وٺي رهي آهي ۽ هن وڏي معاملي تي خاموشيءَ کي ترجيح ڏني آهي. ن ليگ اسٽيبلشمينٽ سان سڌي رستي تي اچڻ بدران خاموشي اختيار ڪئي آهي. ساڳئي وقت آئيني ترميمن لاءِ تحريڪ انصاف (PTI) جي قيادت کي پڻ ان موقعي مان فائدو وٺڻ جون تجويزون ڏنيون پيون وڃن، جڏهن ته باني پي ٽي آءِ جيل ۾ موجود آهي. ذريعن جو چوڻ آهي ته انتظامي عهدن ۽ آبي وسيلن جي ورڇ تان ٿيندڙ هي تنازعو ايندڙ ڪجهه ڏينهن ۾ ڪنهن نئين سياسي موڙ جو سبب بڻجي سگهي ٿو.
سياسي تجزئي نگارن جو چوڻ آهي ته جيڪڏهن پيپلز پارٽي پنهنجي موقف تي قائم رهي ٿي ته ان جا پاڪستان جي آئيني ۽ انتظامي ڍانچي تي گهرا اثر پوندا. صدر آصف علي زرداري ۽ بلاول ڀٽو زرداري پاران صوبائي حقن ۽ سنڌ جي آبي حقن تي ڪنهن به قسم جو سمجھوتو نه ڪرڻ جو عزم نئين سياسي امتحان کي جنم ڏئي رهيو آهي. ايندڙ ڏينهن ۾ نون صوبن جي قيام ۽ آئيني ترميم واري معاملي جو فيصلو ملڪي سياست جو مستقبل طئي ڪندو.
