ڄامشورو:(پ_ر): شهيد الله بخش سومرو (سيبس) يونيورسٽي آف آرٽ، ڊيزائن اينڊ هيريٽيجز، ڄامشوري پاران پاڪستان جي هٿياربند فوج سان يڪجهتي جي اظهار ۽ بلوچستان ۾ تازي ٽرين تي حملي جي مذمت ڪرڻ لاءِ هڪ ريلي جو انعقاد ڪيو ويو. وائيس چانسلر پروفيسر ڊاڪٽر ارابيلا ڀٽو جي اڳواڻي ۾ ٿيندڙ ريلي ۾ شاگردن، فيڪلٽي ميمبرن ۽ يونيورسٽي جي عملي پرجوش شرڪت ڪئي. شرڪت ڪندڙن يونيورسٽي جي جي مختلف روڊن رستن تي مارچ ڪيو ۽ بينر کڻي قومي سيڪيورٽي فورسز جي حمايت ۾ نعرا هنيا جڏهن ته ٽرين تي حملي جي سخت مذمت ڪئي. شرڪت ڪندڙن پاڪستان زنده آباد، پاڪ فوج زنده آباد جا نعرا لڳايا ۽ دهشتگرد سرگرمين جي مذمت ڪئي. ريلي کي خطاب ڪندي، پروفيسر ڊاڪٽر ارابيلا ڀٽو، تشدد ۽ دهشتگردي جي ڪاررواين خلاف اتحاد جي اهميت کي اجاگر ڪيو. هن زور ڏنو ته اهڙا واقعا نه رڳو قومي سلامتي کي خطرو آهن پر ملڪ جي امن ۽ استحڪام کي به خراب ڪن ٿا. شرڪت ڪندڙن پاڪستان جي هٿياربند فوج جي مڪمل حمايت، قومي اتحاد ۽ امن لاءِ پنهنجي عزم جو اظهار ڪيو. ريلي پاڪستان جي حفاظت ۽ خوشحالي لاءِ دعا سان ختم ٿي، جڏهن ته شرڪت ڪندڙن قوم جي هٿياربند فوجن جي حمايت جاري رکڻ ۽ هر قسم جي دهشتگردي خلاف بيهڻ جو عهد ڪيو.
