اعليٰ ثانوي تعليمي بورڊ ڪراچي 28 اپريل کان شروع ٿيندڙ ساليانا امتحان ملتوي ڪري ڇڏيا. رپورٽ موجب انٽر بورڊ جي پڌرائي موجب هاڻ اهي امتحان 5 مئي 2025 کان شروع ٿيندا، امتحانن جي تاريخ ۾ تبديلي ٻن سببن جي آڌار تي ڪئي وئي آهي. انٽر بورڊ موجب اعليٰ ثانوي تعليمي بورڊ طرفان جوڙيل خصوصي ڪميٽي جي سفارشن تي پرچن ۾ گريس مارڪس ڏيڻ جو عمل به جاري آهي. ڪراچي ۾ ڪجهه اهڙا امتحاني مرڪز آهن جن ۾ 28 اپريل تائين ميٽرڪ جا امتحان جاري آهن ۽ انهن مرڪزن کي انٽر بورڊ جي امتحانن لاءِ به امتحاني مرڪز ٺاهيو ويو. امتحانن ۾ شفافيت کي يقيني بنائڻ جي لاءِ انٽر بورڊ جي امتحانن جي شروع واري تاريخ ۾ تبديلي ڪئي وئي آهي. ياد رهي ته بورڊ آف انٽرميڊيٽ ۾ اڃان تائين ڪوبه نئون چيئرمين نامزد نه ٿي سگهيو آهي، سرچ ڪميٽي طرفان چونڊيل 2 چيئرمين انٽرميڊيٽ بورڊ جو چارج وٺڻ کان معذرت ڪري چڪا آهن.
