موسميات کاتي نائون الرٽ جاري ڪندي خبردار ڪيو آهي ته عرب سمنڊ ۾ ٺهيل سامونڊي طوفان “شڪتي” پنهنجي رخ ۾ تبديلي آڻي رهيو آهي ۽ ايندڙ ڏينهن ۾ وڌيڪ اثرانداز ٿي سگهي ٿو.اداري موجب طوفان جو مرڪز هن وقت ڪراچي کان لڳ ڀڳ 700 ڪلو ميٽر ڏکڻ اوڀر ۾ موجود آهي ۽ گذريل ڇهن ڪلاڪن دوران اهو ڏکڻ اوڀر طرف وڌيو آهي. اڳڪٿي موجب 6 آڪٽوبر تائين طوفان ڏکڻ اوڀر اولهه طرف وڌندو، جنهن کان پوءِ اهو آهستي آهستي ڪمزور ٿيڻ شروع ٿي ويندو.موسميات کاتي جو چوڻ آهي ته طوفان جي اثر هيٺ سنڌ ۽ بلوچستان جي سامونڊي علائقن ۾ برسات جو امڪان آهي، جڏهن ته سامونڊي هنڌن تي 55 ڪلو ميٽر في ڪلاڪ جي تيز هوائون هلڻ ۽ سمنڊ ۾ چاڙهه جو خطرو موجود آهي.ماهيگيرن کي صلاح ڏني وئي آهي ته هو 5 آڪٽوبر تائين اونهي سمنڊ ۾ وڃڻ کان پاسو ڪن. اداري موجب طوفان جي مرڪز جي چوڌاري هوائن جي رفتار 135 ڪلو ميٽر في ڪلاڪ تائين پهچي سگهي ٿي، جڏهن ته 5 کان 7 آڪٽوبر دوران سامونڊي لهرون معمولي کان گهڻيون بلند ٿي سگهن ٿيون.موسميات کاتي جو چوڻ آهي ته سائيڪلون وارننگ سينٽر ڪراچي طوفان جي صورتحال تي ويجهي نظر رکي رهيو آهي.
