دهشتگردي جي انت واري عدالت(اي ٽي سي) اسلام آباد تحريڪ انصاف جي چيئرمين عمران خان جا ضمانت نه ٿيڻ جوڳا گرفتاري وارنٽ جاري ڪري ڇڏيا.
پي ٽي آءِ چيئرمين ۽ ٻين خلاف اسلام آباد جي رمنا ٿاڻي ۾ 2 ۽ گولڙه ٿاڻي ۾ داخل هڪ ڪيس جي ٻڌڻي ٿي.پي ٽي آءِ چيئرمين طرفان رمنا ٿاڻي ۾ داخل ڪيس ۾ حاضري کان ڇوٽ جي درخواست داخل ڪئي وئي. عمران خان جي وڪيل سردار مصروف خان چيو ته پي ٽي آءِ چيئرمين کي اڄ لاهور هاءِ ڪورٽ ۾ پيش ٿيڻو آهي. لاهور هاءِ ڪورٽ ۾ پيشي سبب هو اسلام آباد جي عدالت ۾ پيش نٿو ٿي سگهي.دهشتگردي جي انت واري عدالت جي جج ابوالحسنات ريمارڪس ڏنا ته پي ٽي آءِ چيئرمين کي عدالت ۾ پيش ٿيڻو پوندو. عدالت جوڊيشل ڪمپليڪس حملي ڪيس ۾ عمران خان سميت فرخ حبيب، شبلي فراز ۽ حسان نيازي جا گرفتاري وارنٽ جاري ڪري ڇڏيا.. اي ٽي سي عدالت پي ٽي آءِ چيئرمين سميت ٻين جوابدارن کي ذاتي حيثيت ۾ 19 جولاءِ تي طلب ڪري ورتو.
