ڌابيجي پمپنگ اسٽيشن تي ڪيبل فالٽ ٿيڻ سبب ڪراچي جي مختلف علائقن ۾ پاڻي جي فراهمي معطل ٿي وئي، جنهن سبب شهرين کي سخت تڪليفن کي منهن ڏيڻو پيو۔ ذريعن موجب پمپنگ اسٽيشن جا ٽي پمپ ڪيبل فالٽ سبب بند ٿي ويا، جنهن سان شهر کي 54 ملين گيلن پاڻي جي فراهمي متاثر ٿي آهي۔ڪراچي واٽر اينڊ سيويريج ڪارپوريشن جي ترجمان موجب ڪي اليڪٽرڪ انتظاميا واعدو ڪيو آهي ته فالٽ 18 ڪلاڪن ۾ درست ڪيو ويندو۔ ٻئي پاسي ڪي اليڪٽرڪ جي ترجمان پمپنگ اسٽيشن تي بجلي بريڪ ڊائون جي خبرن کي بي بنياد قرار ڏيندي چيو ته 22 مان 19 پمپن تي بجلي فراهمي جاري آهي، جڏهن ته هيٺ زمين ڪيبل فالٽ سبب ٽي پمپنگ موٽر متاثر ٿيا هئا، جيڪي فالٽ درست ٿيندي ئي بحال ڪيا ويندا۔واضح رهي ته گذريل مهيني 28 آڪٽوبر تي به حب ڪينال جي سار سنڀال جي ڪم سبب ڪراچي ۾ ٻه ڏينهن پاڻي جي فراهمي بند ٿي وئي هئي، جنهن ۾ ويسٽ، ڪيماري ۽ سينٽرل ضلعن ۾ پاڻي جي کوٽ رهي۔واٽر ڪارپوريشن شهرين کي هدايت ڪئي هئي ته پاڻي جو استعمال احتياط سان ڪن ۽ ضرورت موجب اڳواٽ ذخيرو ڪري ڇڏين ته جيئن بندش دوران ڏکيائي نه ٿئي۔ ترجمان موجب اهي سڀ مرمتي قدم پاڻي جي ڊگهي مدي وارن نظام کي بهتر بڻائڻ ۽ تقسيم کي وڌيڪ موثر ڪرڻ لاءِ کنيا پيا وڃن۔
