لاهور (ويب ڊيسڪ): وزيراعليٰ پنجاب مريم نواز شریف صوبو ڀر ۾ موٽرسائيڪل سميت سڀني گاڏين لاءِ اي ٽيگ لازمي قرار ڏئي ڇڏيو آهي ۽ هفتي اندر هڪ جامع مائڪرو سڪيورٽي پلان پيش ڪرڻ جي هدايت پڻ ڏني آهي.
پير تي امن امان جي اعليٰ سطح اجلاس جي صدارت ڪندي وزيراعليٰ نگراني، سرحدي نگراني ۽ انسداد دهشتگردي جي تيارين کي مضبوط ڪرڻ لاءِ اهم فيصلا ڪيا. اجلاس ۾ پنجاب سائبر ڪرائم انويستيگيشن يونٽ جي قيام ۽ سربراهه جي مقرري جي منظوري ڏني وئي، جنهن تحت عورتن ۽ ڇوڪرين سان لاڳاپيل آن لائن ڪيسز کي حل ڪرڻ لاءِ وقف سيل قائم ڪيو ويندو، جڏهن ته ضلعي سطح تي به آن لائن ڪرائم سينٽرز قائم ڪيا ويندا.
وزيراعليٰ غير روايتي داخلي رستن تي نقل و حرڪت تي پابندي ۽ ڊرون پابندين تي سخت عملدرآمد جو حڪم ڏنو. داخلي رستن تي سرچ لائيٽس لڳائڻ، چوڪين جي ڇتن جي حفاظت جي نگراني، ۽ جديد ڊرون دفاعي نظام جي فوري خريداري جي پڻ منظوري ڏني وئي.
فعال پوليسنگ تي زور ڏيندي مريم نواز شريف چيو ته جرائم پيشه ۽ دهشتگردن خلاف ڪومبنگ آپريشنز بلا تعطل جاري رهندا. رينجرز موبائل پوليس (RMP) يونٽ کي ڪرائوڊ مينيجمينٽ لاءِ جديد اوزار ۽ تربيت فراهم ڪئي ويندي. يوم حضرت علي رضي الله عنه لاءِ ايس او پيز مذهبي اسڪالرز سان مشاورت بعد حتمي شڪل اختيار ڪنديون.
وزيراعليٰ خواجه سلمان رفيق ۽ لاهور پوليس کي سڪيورٽي صورتحال تي بروقت ردعمل ڏيڻ تي ساراهيو ۽ چيو ته خودڪش حملي ڪندڙن جي داخلي رستن تي نگراني انتهائي ضروري آهي. هن چيو: “جنگ جا طريقا بدلجي چڪا آهن؛ اسان کي پاڻ کي ان مطابق تيار رکڻو پوندو.”
