اسلام آباد (ويب ڊيسڪ): وزيراعظم شهباز شريف واشنگٽن ۾ وائيٽ هائوس ڪوريسپونڊنٽس ڊنر دوران فائرنگ واري واقعي تي گهري ڳڻتي ۽ صدمي جو اظهار ڪيو آهي.
سماجي رابطن جي ويب سائيٽ ايڪس تي جاري بيان ۾ وزيراعظم چيو ته واشنگٽن ڊي سي ۾ پيش آيل واقعو تشويشناڪ آهي، جڏهن ته اها ڳالهه اطمينان جوڳي آهي ته آمريڪي صدر ڊونلڊ ٽرمپ، خاتون اول ميلانيا ٽرمپ ۽ ٻيا شرڪت ڪندڙ محفوظ آهن.
وزيراعظم چيو ته سندس دعائون ۽ نيڪ تمنائون آمريڪي قيادت سان گڏ آهن ۽ هو سندن سلامتي لاءِ دعاگو آهي.
هوڏانهن صدر مملڪت آصف علي زرداري به واقعي جي سخت مذمت ڪندي ان کي دهشتگردي جي گهنائوني شڪل قرار ڏنو ۽ صدر ٽرمپ ۽ خاتون اول جي محفوظ رهڻ تي اطمينان ظاهر ڪيو۔
