پي ٽي آءِ باني عمران خان، ان جي گهر واري بشريٰ بي بي، اڳوڻي صدر عارف علوي، ڪي پي ڪي جي وڏي وزير علي امين گنڊاپور ۽ عمر ايوب سميت ڪيترن ئي پي ٽي آءِ اڳواڻن جي خلاف دهشتگردي جي قلمن تحت ڪيس داخل ڪيو ويو. پي ٽي آءِ اڳواڻن جي خلاف راولپنڊي جي نصيرآباد ٿاڻي ۾ ڪيس داخل ڪيو ويو آهي جنهن ۾ عليمه خان، حماد اظهر، اسد قيصر، شهريار رياض سميت 75 پي ٽي آءِ اڳواڻن کي به نامزد ڪيو ويو آهي. ڪيس جي متن ۾ چيو ويو آهي ته عمران خان 22 نومبر تي اڊيالا جيل ۾ پارٽي اڳواڻن سان ملاقات ۾ اسلام آباد ۾ چڙهائي لاءِ زور ڀريو جڏهن ته بشريٰ بي بي سوشل ميڊيا تي جاري ڪيل بيان سان ڪارڪنن کي اشتعال ڏياريو. ڪيس ۾ چيو ويو آهي ته جوابدارن سازش جي تحت روڊ بلاڪ ڪري عوام جو رستو روڪيو، جوابدارن پوليس آفيسرن تي ڏنڊن، غليل، بلورن ۽ پٿرن سان حملو ڪيو. راولپنڊي ۾ داخل ڪيل ڪيس ۾ دهشتگردي سميت گڏيل طور تي 16 قلم شامل ڪيا ويا آهن.
