نئين دھلي:ڀارتي ڪرڪيٽ ٽيم جي ھيڊ ڪوچ گوتم گمڀير واضح ڪيو آھي تھ تجرباڻي وڪيٽ ڪيپر بيٽسمين سنجو ٽي ٽوئنٽي فارميٽ ۾ قومي ٽيم جي پھرين ترجيح آھي، جڏھن تھ نوجوان رانديگر ويڀَو کي موقعي لاءِ اڃا ڪجھ وقت انتظار ڪرڻو پوندو. افغانستان خلاف ايندڙ ٽي ٽوئنٽي سيريز جي سلسلي ۾ ڳالھائيندي سندس چوڻ ھو تھ ڪنھن بھ رانديگر جي چونڊ صرف ھن جي ذاتي اسڪور جي بنياد تي نھ ٿي ٿئي، پر ٽيم تي ان جي مثبت اثر کي پرکيو وڃي ٿو.
گوتم گمڀير ميڊيا سان ڳالھھ ٻولھھ ڪندي چيو تھ جديد ڪرڪيٽ ۾ رڳو رنسون يا وڪيٽون وٺڻ ئي ڪافي ناھي، پر اصل اھميت ان ڳالھھ جي آھي تھ ڪو رانديگر ميدان تي پنھنجي راند ذريعي ميچ جو رخ ڪيتري تائين تبديل ڪري سگھي ٿو. ھن چيو تھ سنجو سمشن پنھنجي قابليت ۽ شاندار بيٽنگ ذريعي اھو ثابت ڪيو آھي تھ ھو ٽيم جي ضرورتن موجب کيڏڻ جي صلاحيت رکي ٿو، جنھن ڪري کيس فرسٽ آپشن طور برقرار رکيو ويو آھي.
ٻئي پاسي، نوجوان بيٽسمين ويڀَو جي حوالي سان ڳالھائيندي ڀارتي ڪوچ جو چوڻ ھو تھ ھو ھڪ شاندار ٽئلنٽ آھي جنھن جو مستقبل روشن نظر اچي ٿو، پر ھن وقت ٽيم جو ميچ ڪومبينيشن ۽ گھربل توازن اھڙو آھي جو کيس پنھنجي واري لاءِ صبر سان انتظار ڪرڻو پوندو. تربيتي ڪيمپس ۽ ڊوميسٽڪ ڪرڪيٽ ۾ مسلسل محنت ھن لاءِ ايندڙ ڏينھن ۾ فائدي مند ثابت ٿيندي.
ماھرن جو چوڻ آھي تھ گوتم گمڀير جو اھو رويو ۽ صاف گوئي ٽيم اندر صحت مند مقابلي کي جنم ڏيندي، جنھن سان رانديگرن جو مورال وڌندو ۽ ھو پنھنجي بھترين راند پيش ڪرڻ جي ڪوشش ڪندا. افغانستان خلاف سيريز ۾ ان حڪمت عملي جا ڪھڙا نتيجا نڪرندا، ان جو اندازو ميچن دوران ئي لڳائي سگھبو.
