وزيراعظم جي سياسي معاملن واري صلاحڪار، راڻا ثناءُالله، پاڪستان تحريڪ انصاف (پي ٽي آءِ) کان اپيل ڪئي آهي ته هو پنهنجو احتجاج 14 آگسٽ تي ملتوي ڪن. هن چيو ته آزاديءَ جو ڏينهن سڄي قوم لاءِ گڏجي جشن ملهائڻ جو موقعو آهي نجي ٽي وي جي پروگرام ۾ ڳالهائيندي، راڻا ثناءُالله پي ٽي آءِ کي صلاح ڏني ته هو يوم آزاديءَ جي موقعي تي پنهنجي ملڪ گير احتجاج جو سڏ واپس وٺن ۽ ان کي ڪنهن ٻئي ڏينهن لاءِ ملتوي ڪن. هن چيو ته 14 آگسٽ کي هن سال ”معرڪه حق جي ڪاميابي“ طور ملهايو پيو وڃي، تنهن ڪري بهتر آهي ته احتجاج کي هڪ ڏينهن اڳ يا پوءِ ڪيو وڃي ته جيئن آزاديءَ واري ڏينهن جي تقريبن تي ڪو به اثر نه پوي نواز شريف ۽ آئيني ترميم هڪ ٻئي سوال جي جواب ۾ راڻا ثناءُالله چيو ته مسلم ليگ (ن) جو اڳواڻ نواز شريف ”ايڪسٽينشن“ (نوڪري جي مدي ۾ واڌ) جي مخالفت ڪري ٿو. هن وڌيڪ چيو ته 27هين آئيني ترميم هن وقت غور هيٺ ناهي، پر ڪنهن به آئيني ترميم جو اختيار صرف پارليامينٽ وٽ آهي پي ٽي آءِ جي احتجاج جو سڏ ياد رهي ته 6 آگسٽ تي پي ٽي آءِ جي باني چيئرمين عمران خان جي اڳوڻي ٽوئٽر اڪائونٽ تان هڪ پيغام جاري ٿيو هو، جنهن ۾ پارٽي کي هدايت ڪئي وئي هئي ته هو ملڪ ۾ ”جاري فاشزم“ جي خلاف پوري طاقت سان روڊن تي نڪرن. اهو بيان 5 آگسٽ تي پي ٽي آءِ جي احتجاج جي ناڪام ٿيڻ کان هڪ ڏينهن کان پوءِ سامهون آيو هو.
