غزه جنگبندي جون ڳالهيون شروع ٿيندي ئي اسرائيلي فوج غزه تي به حملا وڌائي ڇڏيا آهن. عرب ميڊيا جي رپورٽن موجب اسرائيلي فورسز خان يونس ۾ گاڏي تي ڊرون حملو ڪيو ۽ رهائشي علائقن تي بمباري ڪئي جنهن جي نتيجي ۾ 65 کان وڌيڪ فلسطيني شهيد ٿي ويا. ميڊيا رپورٽن موجب اسرائيلي حملي ۾ هڪ ئي خاندان جي 7 ٻارن سميت 11 ڄڻا به شامل آهن. ايمنسٽي انٽرنيشنل چيو آهي ته اسرائيل طرفان ڪمال عدوان اسپتال جي ڊائريڪٽر کي حراست ۾ رکڻ غزه ۾ صحت جي شعبي کي تباهه ڪرڻ ۽ نسل ڪشي جو ارادو ظاهر ڪري ٿو. مصر ۽ قطر جي ڪوششن سان قطر ۾ غزه جنگبندي ڳالهيون ٻيهر شروع ٿي ويون آهن. حماس اڳواڻ باسم نعيم معاهدي جي لاءِ اسرائيلي فوج جي واپسي ۽ بي گهر فلسطينين جي پنهنجن گهرن ڏانهن واپسي ضروري قرار ڏئي ڇڏي آهي.
