شيخ ڀرڪيو ويجهو فاران شوگر مل جي ايڊمن مختيار لغاري طرفان جبري طور نوڪري مان ڪڍيل پورهيت محرم خاصخيلي جي پيرسن امڙ ۽ سندس ڀينرون چار ڏينهن کان مل جي گيٽ آڏو احتجاج تي ويٺل آهن. هنن مظلوم عورتن کي سخت سياري جي راتين ۽ ڏينهن ۾ روڊ تي ويٺل ڏسي به مل انتظاميا تي ڪو اثر نه ٿيو آهي. محرم خاصخيلي، جيڪو گذريل ڪيترن سالن کان فاران شوگر مل ۾ مزدوري ڪندو هو، بنا ڪنهن ڄاڻايل سبب جي کيس نوڪري مان ڪڍيو ويو. جڏهن هو پنهنجو حق حاصل ڪرڻ لاءِ انتظاميا سان ڳالهايو، ته کيس نظرانداز ڪيو ويو ۽ ان کانپوءِ سندس گهر ۾ ڏک ۽ مايوسي ڇانيل آهي. محرم جي امڙ، هڪ پيرسن عورت، جيڪا پنڌ به ڏکيائي سان ڪري سگهي ٿي، پنهنجي نياڻين سان گڏ احتجاج ڪندي چيو ته، “اسان جو ڀاڪر نه کڻندو ته ڪير کڻندو؟ منهنجي پٽ کي بنا ڪنهن ڏوهه جي نوڪري مان ڪڍيو ويو آهي. اسان وٽ ڪوبه آسرو ناهي، ۽ اڄ اسان پنهنجا حق گهرڻ لاءِ آيا آهيون.” احتجاج جي هن منظر ۾ نياڻين جا روئڻ ۽ دانهون دل ڏاريندڙ آهن، پر مل انتظاميا ۽ ايڊمن مختيار لغاري وٽ ڪو جذباتي يا انساني جواب ناهي. ڪيترائي ماڻهو، جيڪي روزانه ان روڊ تان گذرن ٿا، عورتن جي هن حالت کي ڏسي ڏکارا ٿين ٿا، پر مل جي دروازن اندر کان بي حسي جي ديوارن کي ٽوڙڻ وارو ڪو ناهي. محرم جي ڀيڻن مان هڪ چيو ته، “اسان پنهنجا گهر ڇڏي آيا آهيون. اسان کي گهر ۾ ڪڻڪ جو داڻو به نه بچيو آهي. اسان کي انصاف گهرجي، ۽ اسان پنهنجي آخري ساھ تائين احتجاج ڪندا رهنداسين.” چار ڏينهن گذري چڪا آهن، پر مختيار لغاري يا مل انتظاميا مان ڪنهن هڪ به عورتن سان رابطو ڪرڻ جي تڪليف نه ڪئي آهي. ڪيترن ئي سماجي ڪارڪنن ۽ صحافين هن واقعي تي افسوس جو اظهار ڪيو آهي ۽ حڪومت کان مطالبو ڪيو آهي ته مظلوم خاندان کي انصاف ڏياريو وڃي. اهو ڏسڻو آهي ته ڇا فاران شوگر مل جي انتظاميا پنهنجي بي حسي کي ختم ڪندي محرم خاصخيلي کي ٻيهر نوڪري تي بحال ڪندي يا هي احتجاج انساني حقن جي هڪ اهم يادگار بڻجي رهندو؟
