دهشتگردي جي انت واري عدالت راولپنڊي ۾ 9 مئي جي ايڇ ڪيو حملي ڪيس جي ٻڌڻي ٿي، جتي عدالت پي ٽي آءِ باني عمران خان جون ٻن اهم درخواستون رد ڪري ڇڏيون. جج امجد علي شاهه جي سربراهي ۾ ٻڌڻي دوران عمران خان جا وڪيل فيصل ملڪ ۽ سلمان اڪرم راجه عدالت ۾ پيش ٿيا. وڪيل صفائي عدالت کي چيو ته 19 سيپٽمبر جي عدالتي ڪارروائي جو ٽرانسڪرپٽ ۽ سي سي ٽي وي فوٽيج مهيا ڪئي وڃي ۽ جيل ٽرائل منتقل ڪرڻ بابت هاءِ ڪورٽ جي حڪم تائين ڪارروائي روڪيو وڃي. عدالت چيو ته واٽس ايپ ڪميونيڪيشن کي هاءِ ڪورٽ ۾ چيلينج ڪيو وڃي، هتي ڪارروائي روڪي نٿي سگهجي. عدالت وڌيڪ چيو ته گذريل ٻڌڻي تي به اوهان کي باني سان ڳالهائڻ جو موقعو مليو هو پر پوءِ اوهان بائيڪاٽ ڪيو. ٻئي پاسي پراسيڪيوٽر دليلن ۾ چيو ته وڪيل صفائي جو رويو سنجيده ناهي، اهي عدالت جو وقت ضايع ڪري رهيا آهن. سلمان اڪرم راجه چيو ته ڪمري ۾ بند شخص کي واٽس ايپ ڪال تي پيش ڪرڻ آئين جي خلاف آهي. عدالت جواب ڏنو ته اوهان کي پورو حق آهي هاءِ ڪورٽ ۾ اپيل ڪرڻ جو، هتي ڪارروائي نه روڪي سگهجي ٿي. عدالت ڌرين جا دليل ٻڌڻ کان پوءِ عمران خان جون ٻئي درخواستون رد ڪري ڇڏيون ۽ کيس واٽس ايپ لنڪ ذريعي عدالت ۾ پيش ڪيو ويو. وڪيل صفائي عمران خان سان ڳالهائڻ جي اجازت ورتي پر آواز ۽ تصوير واضح نه هجڻ سبب بائيڪاٽ ڪري ڇڏيو ۽ عدالت کان ٻاهر هليا ويا. ٻڌڻي دوران استغاثه جي 8 گواهن جا بيان قلمبند ڪيا ويا جن ۾ پيمرا جو ايڊيشنل ڊائريڪٽر نادر خان، ايف آءِ اي جا ٽيڪنيڪل اسسٽنٽ انيس الرحمان ۽ محمد عمران، پي آءِ ڊي جو ڊپٽي ڊائريڪٽر محمد طارق، حسنين وزير، اڳوڻو اسسٽنٽ ڪمشنر محمد عبدالله، ارشاد ڀٽي ۽ گهرو وزارت جو سيڪشن آفيسر بلال احمد شامل هئا. اڄ تائين گڏيل طور تي 41 گواهن جا بيان رڪارڊ ٿي چڪا آهن، جڏهن ته ايندڙ ٻڌڻي تي وڌيڪ گواهن کي طلب ڪيو ويو آهي.
