لاڙڪاڻو: سنڌ حڪومت پاران لاڙڪاڻي شهر ۾ عوام کي صحت جون جديد سهولتون فراهم ڪرڻ لاءِ 600 بسترن تي مشتمل هڪ جديد اسپتال اڏڻ جو فيصلو ڪيو ويو آهي، جنهن کي جولاءِ 2028ع تائين مڪمل ڪرڻ جو هدف مقرر ڪيو ويو آهي. هن اهم منصوبي سان لاڙڪاڻي سميت سڄي لاڙڪاڻي ڊويزن جي عوام کي صحت جي شعبي ۾ وڏي سهولت ميسر ايندي.
ذريعن موجب هن جديد اسپتال ۾ عالمي معيار جون طبي سهولتون، جديد ترين آپريشن ٿيٽر، ايمرجنسي وارڊ ۽ مختلف بيمارين جي علاج لاءِ خاص شعبا قائم ڪيا ويندا. حڪومتي اختيارين پاران لاڳاپيل کاتن کي هدايت ڪئي وئي آهي ته تعميراتي ڪم جي معيار تي ڪو به سمجهوتو نه ڪيو وڃي ۽ مقرر وقت اندر منصوبي کي مڪمل ڪيو وڃي ته جيئن عوام جلد کان جلد ان مان فائدو حاصل ڪري سگهي.
صحت کاتي جي اعليٰ اختيارين جو چوڻ آهي ته هن منصوبي لاءِ گهربل فنڊز مرحليوار جاري ڪيا ويندا ته جيئن ترقياتي ڪم ۾ ڪا به رڪاوٽ پيش نه اچي. هن اسپتال جي قيام سان ڪراچي ۽ ٻين وڏن شهرن جي اسپتالن تي مريضن جو دٻاءُ گهٽ ٿيندو ۽ مقامي سطح تي ئي بهترين علاج جون سهولتون دستياب ٿينديون.
