پنجاب جي داخلا کاتي جيلن ۾ قيدين جي سزا معافي لاءِ قاعدا ۽ ضابطا جاري ڪري ڇڏيا آهن، جن ۾ قيدين جي دوران قيد عملن ۽ ڪارڪردگي جي بنياد تي سزا معافي مقرر ڪئي وئي آهي. جيل سڌارن جي تحت، قيد دوران حفظ قرآن ۽ ترجمو مڪمل ڪرڻ وارن قيدين کي 6 مهينن کان 2 سالن تائين سزا معافي ڏني ويندي. ميٽرڪ، انٽر، بي اي ۽ ايم اي مڪمل ڪندڙ قيدين کي سندن تعليمي ڊگري جي حساب سان 6 مهينن کان 10 مهينن تائين سزا معافي ملندي. ان کان علاوه، سٺو ڪردار رکڻ وارن قيدين کي هڪ سال جي قيد با مشقت تي 15 ڏينهن جي سزا معافي ملندي، جڏهن ته 3 سال جي قيد مڪمل ٿيڻ تي 15 ڏينهن سان گڏ هڪ مهيني جي اضافي سزا معافي ڏني ويندي. دوران قيد اليڪٽرشن، موٽر وائنڊنگ، بيوٽيشن ۽ ٽيڪنيڪل ڪورس مڪمل ڪندڙ قيدين کي هڪ مهيني تائين سزا معافي ملندي. بهرحال، دهشتگردي، تخريب ڪاري ۽ رياست مخالف سرگرمين ۾ ملوث قيدين کي معافي جو حق حاصل نه هوندو، ۽ 4 مهينن کان گهٽ قيد با مشقت واري قيدين کي پڻ مشقت جي بدلي هي رعايت نه ملندي. جيل سڌارن مطابق هن وقت سزا معافي جو ڪو به ڪيس التوا ۾ ناهي. آءِ جي جيل هر مهيني تعليمي قابليت جي بنياد تي سزا معافي جو نوٽيفڪيشن جاري ڪرڻ جا پابند هوندا ۽ اهي هر مهيني داخلا کاتي کي سرٽيفڪيٽ موڪليندا.
