راولپنڊي/پشاور: پاڪستاني سيڪيورٽي فورسز افغان سرحد تان ملڪ ۾ داخل ٿيڻ جي ڪوشش کي ناڪام بڻائيندي هڪ وڏي ڪارروائي ۾ 15 خوارج دهشتگردن کي هلاڪ ڪري ڇڏيو آهي. پاڪ فوج جي عوامي رابطن واري شعبي آءِ ايس پي آر (ISPR) موجب، هيءَ ڪارروائي خيبر پختونخوا جي سرحدي علائقي ۾ ڪئي وئي، جتي دهشتگردن سرحد پار کان پاڪستاني حدن ۾ گهڙڻ جي ڪوشش ڪئي هئي.
سيڪيورٽي ذريعن موجب، سرحد تي مقرر جوانن دهشتگردن جي حرڪت کي بروقت سڃاڻي ورتو ۽ کين گهيرو ڪيو، جنهن کانپوءِ ٻنهي طرفن کان سخت فائرنگ جو تبادلو ٿيو. فائرنگ جي نتيجي ۾ 15 دهشتگرد مارجي ويا، جڏهن ته سندن قبضي مان وڏي مقدار ۾ جديد هٿيار، بارودي مواد ۽ خودڪش جيڪٽون پڻ هٿ ڪيون ويون آهن.
آءِ ايس پي آر (ISPR) جو وڌيڪ چوڻ آهي ته پاڪستاني فوج ملڪي سرحدن جي حفاظت لاءِ مڪمل طور تي پرعزم آهي ۽ سرحد پار کان دهشتگردي جي ڪنهن به ڪوشش کي ڪامياب ٿيڻ نه ڏنو ويندو. علائقي ۾ وڌيڪ دهشتگردن جي خاتمي لاءِ سرچ آپريشن پڻ جاري آهي ته جيئن امن امان جي صورتحال کي برقرار رکي سگهجي.
