واشنگٽن / بيجنگ (فارين ڊيسڪ): دنيا جي ٻن وڏين معيشتن آمريڪا ۽ چين جي اعليٰ سفارتڪارن وچ ۾ ڏهين دور جون اهم ڳالهيون ٿيون آهن، جنهن ۾ ٻنهي سپر پاورز ٻه طرفن لاڳاپن ۾ ڇڪتاڻ گهٽائڻ ۽ عالمي معاشي نظام جي استحڪام لاءِ مثبت رابطا جاري رکڻ تي اتفاق ڪيو آهي.
چيني پرڏيهي وزارت پاران جاري ڪيل پڌرنامي ۾ چيو ويو ته باهمي احترام، پرامن بقاءَ ۽ مفادن جي تحفظ سان ئي عالمي بحرانن تي ضابطو آڻي سگهجي ٿو. هوڏانهن آمريڪي انتظاميه پڻ واضح ڪيو ته واپاري مسئلن، سامونڊي گذرگاهن ۽ ٽيڪنالاجي ضابطن تي اختلافن باوجود سڌوسنئون مڪالمو ناگزير آهي.
سفارتي ماهرن جو خيال آهي ته انهن ڳالهين سان ايشيا پئسفڪ علائقي ۽ گلوبل سپلائي چين تي مثبت اثر پوندا ۽ ٻنهي ملڪن جي مالي مارڪيٽن ۾ نئين جياپي جي فضا پيدا ٿيندي.
