پي ٽي آءِ جي مخصوص سيٽن بابت چيف اليڪشن ڪمشنر سڪندر سلطان راجا جي صدارت هيٺ اهم ۽ حتمي مشاورتي اجلاس ختم ٿي ويو، ذريعن جو چوڻ آهي ته قانوني ٽيم معطل ميمبرن کي مخصوص سيٽن تي بحال ڪرڻ جي تجويز ڏني آهي. ذريعن جو چوڻ آهي ته مخصوص سيٽن بابت اليڪشن ڪميشن جو هي آخري اجلاس هو، جيڪو ڏيڍ ڪلاڪ جاري رهيو، اجلاس ۾ اليڪشن ڪميشن جي سمورن ميمبرن، لاڳاپيل اختيارين، قانوني ماهرن شرڪت ڪئي ۽ مشاورت کي حتمي شڪل ڏني. اجلاس جي ڪارروائي سان لاڳاپيل ذريعن ٻڌايو ته قانوني ٽيم اليڪشن ايڪٽ تي عملدرآمد جي حتمي سفارش ڪندي چيو ته پارليامينٽ مان منظور ڪيل قانون تي عملدرآمد هر اداري لاءِ لازمي آهي ۽ اليڪشن ايڪٽ ۾ ترميم کانپوءِ ئي اهو حڪم جاري ڪيو ويندو. سپريم ڪورٽ غير موثر ٿي چڪي آهي ذريعن جو اهو به چوڻ آهي ته اجلاس دوران سيڪريٽري قومي اسيمبلي اليڪشن ڪميشن جو دورو به ڪيو، جڏهن ته اليڪشن ڪميشن طرفان اڄ مخصوص سيٽن بابت ڪو فيصلو يا نوٽيفڪيشن جاري ڪرڻ جو امڪان آهي. واضح رهي ته سپريم ڪورٽ پاڪستان تحريڪ انصاف کي مخصوص سيٽن جو حقدار قرار ڏيندي اليڪشن ايڪٽ ترميمي بل تحت پي ٽي آءِ پاران ٻين پارٽين کي سيٽون ڏيڻ واري فيصلي کي رد ڪندي انهن ميمبرن جي رڪنيت معطل ڪري ڇڏي هئي. سپريم ڪورٽ مخصوص سيٽن بابت ڪيس جو فيصلو ٻڌائيندي چيو هو ته پي ٽي آءِ قومي اسيمبلي ۾ مخصوص سيٽن جي حقدار آهي. آئين ۽ قانون ڪنهن به شهري کي اليڪشن وڙهڻ کان نٿو روڪي. سپريم ڪورٽ جي ان فيصلي کانپوءِ حڪومت ۽ ان جي اتحادي پارٽين جي ايوان ۾ ٻه ڀاڱي ٽي اڪثريت ختم ٿي وئي. سپريم ڪورٽ جي ان فيصلي کانپوءِ حڪومت اليڪشن ايڪٽ ترميمي بل 2024 آندو ۽ ان کي آگسٽ ۾ قومي اسيمبلي ۽ سينيٽ مان منظور ڪيو ويو، اليڪشن ايڪٽ ترميمي بل 2024 ڇا آهي؟ اليڪشن ايڪٽ 2017 ۾ هي ترميمي بل 12 جولاءِ تي مخصوص سيٽن تي سپريم ڪورٽ جي فيصلي کانپوءِ آندو ويو آهي، جنهن موجب اليڪشن ڪميشن آف پاڪستان کي حڪم جاري ڪيو ويو هو ته تحريڪ انصاف کي پنهنجون مخصوص سيٽون ڏنيون وڃن. پهرين ترميم موجب ڪو به اسيمبلي ميمبر سياسي پارٽي سان الحاق جي سند کي تبديل نٿو ڪري سگهي. ٻي ترميم موجب ڪنهن به پارٽي لاءِ مخصوص سيٽون حاصل ڪرڻ لاءِ وقت تي لسٽ جمع ڪرائڻ ضروري آهي. پهرين ترميم اليڪشن ايڪٽ 2017 جي سيڪشن 66 ۾، جڏهن ته ٻي ترميم اليڪشن ايڪٽ 2017 جي سيڪشن 104 ۾ ڪئي وئي آهي. ترميمي ايڪٽ 2024 موجب، اهي ٻئي ترميمون انهن جي منظوري کانپوءِ فوري طور تي لاڳو ٿينديون.
