خيرپور :شاهه عبداللطيف يونيورسٽي خيرپور جي انسٽيٽيوٽ آف ڪمپيوٽر سائنس جي انتظام هيٺ سافٽ ويئر ايڪسپو منعقد ڪئي وئي. پروفيسر ڊاڪٽر خليل احمد ابوپوٽو ايڪسپو جو افتتاح ڪيو. ان موقعي تي ڳالهائيندي پروفيسر ڊاڪٽر خليل احمد ابوپوٽو چيو ته ڪنهن به ملڪ جي سماجي ۽ اقتصادي ترقي ۾ سائنس ۽ ٽيڪنالاجي جو ڪردار اهم هوندو آهي. سائنس ۽ ٽيڪنالاجي انسانن لاءِ آساني پيدا ڪئي آهي. اهو اسان جي رويي تي منحصر آهي ته اسان ان کي ڪيئن استعمال ڪري رهيا آهيون. وائيس چانسلر چيو ته سائنس ۽ ٽيڪنالاجي تعليم ۽ تحقيق جي شعبي ۾ اڳتي وڌڻ ۾ مدد ڪري ٿي. سائنس ۽ ٽيڪنالاجي اسان کي هڪ آرامده ۽ جديد زندگي گذارڻ جي قابل بڻائي ڇڏيو آهي. ڊاڪٽر خليل احمد ابوپوٽو هي شاندار ايڪسپو منعقد ڪرڻ تي انسٽيٽيوٽ آف ڪمپيوٽر سائنس جي ڊائريڪٽر پروفيسر ڊاڪٽر جاويد احمد مهر جي ڪوششن کي ساراهيو. ڊاڪٽر خليل احمد ابوپوٽو ڊين فيڪلٽي آف فزيڪل سائنسز پروفيسر ڊاڪٽر قاصد حسين ملاح جي سرپرستي کي به ساراهيو. ڊاڪٽر ابوپوٽو فائنل ائير جي شاگردن جي ڪوششن کي ساراهيو جن بهترين پروجيڪٽ تيار ڪيا آهن. فائنل ايئر جي شاگردن پاران اسڪول مئنيجمينٽ سسٽم، فيس اٽينڊنس سسٽم، اسمارٽ اسپتال مينيجمينٽ سسٽم، گرين پاڪستان اي ڪامرس ويب سائيٽ، ريٽيل مينيجمينٽ سسٽم، آن لائين بلاگنگ ايپليڪيشن، ووٽ ڪاسٽ سسٽم، آن لائين اپائنٽمينٽ مينيجمينٽ سسٽم تي 58 کان وڌيڪ پروجيڪٽ تيار ڪيا ويا. اهي پراجيڪٽ ڪميونٽي ، سماج ۽ صنعت جي بهتري سان لاڳاپيل آهن. پروفيسر ڊاڪٽر تاج محمد لاشاري ڊين فيڪلٽي آف سوشل سائنسز، پروفيسر ڊاڪٽر ارم راڻي ڊائريڪٽر ڪوالٽي انهانسمينٽ سيل، پروفيسر ڊاڪٽر ثمينه راڄپر ڊائريڪٽر اورڪ، پروفيسر ڊاڪٽر هدايت الله شيخ، پروفيسر ڊاڪٽر عبدالله ميتلو، رجسٽرار مريد حسين ابوپوٽو، ڊاڪٽر معشوق علي مهر، اسدالله ڪيهر، وائيس چانسلر جو سيڪريٽري زوهيب ميمڻ ۽ ٻيا پڻ موجود هئا. ايڪسپو جا ڪوآرڊينيٽر پروفيسر ڊاڪٽر رياض حسين شيخ ۽ ڊاڪٽر رفاقت حسين آرائين هئا.
