سنڌ جي ميڊيڪل ۽ ڊينٽل ڪاليجن ۾ داخلا لاءِ ايم ڊي ڪيٽ جا امتحان اڄ ورتا ويندا. هي امتحان ڪراچي، حيدرآباد، ڄامشورو، شهيد بينظير آباد، لاڙڪاڻو ۽ سکر ۾ هڪ ئي وقت ورتو ويندو ۽ ٽيسٽ ۾ ڪل 38 هزار 609 اميدوار حصو وٺندا. آءِ بي اي سکر موجب پيپر 200 کان وڌيڪ چونڊ سوالن تي مشتمل هوندو، جنهن جو مدو 3 ڪلاڪ هوندو. ايم ڊي ڪيٽ ٽيسٽ لاءِ ڪراچي ۾ اين اي ڊي يونيورسٽي ۽ جامعه ڪراچي ۾ امتحاني مرڪز قائم ڪيا ويا آهن، جتي مسڪين، ميٽروول ۽ شيخ زيد دروازن کان داخلا ممڪن ٿي سگهندي. اميدوار IBA پبلڪ اسڪول، گيٽ نمبر 3 سکر مان داخل ٿي سگھندا. ڄامشورو گيٽ نمبر 2 کان مهراڻ يونيورسٽي ۾ داخل ٿيڻ گهرجي. حيدرآباد جي پبلڪ اسڪول لطيف آباد ۾ امتحاني سينٽر قائم ڪيو ويو آهي، اميدوار اسڪول جي مين گيٽ ذريعي داخل ٿي سگهندا. اميدوار شهيد بينظير آباد جي ڪوسٽ مين گيٽ ۽ لاڙڪاڻي پوليس ٽريننگ اسڪول جي مين گيٽ کان امتحاني مرڪزن ۾ داخل ٿيندا. MD CAT ٽيسٽ اميدوارن کي موبائيل فون، سمارٽ واچز ۽ اليڪٽرانڪ گيجٽ کڻي اچڻ جي سختي سان منع ڪئي وئي آهي. امتحاني مرڪزن ۾ اميدوارن لاءِ اصل ايڊمٽ سلپ، شناختي ڪارڊ ۽ ٻيا اهم دستاويز لازمي قرار ڏنا ويا آهن، جڏهن ته سمورن سينٽرن ۾ اميدوارن جي والدين لاءِ ويٽنگ ايريا جو به بندوبست ڪيو ويو آهي. واضح رهي ته ايم ڊي ڪيٽ جي ٽيسٽ اٽڪل 2 مهينا اڳ سڄي ملڪ ۾ ورتي وئي هئي پر سوشل ميڊيا تي پيپر ليڪ ٿيڻ بعد امتحان جا نتيجا رد ڪري ٻيهر ٽيسٽ وٺڻ لاءِ عدالت ۾ درخواست داخل ڪئي وئي هئي. عدالتي حڪمن موجب هاڻي ايم ڊي ڪيٽ 2024 کي آءِ بي اي سکر ٻيهر ترتيب ڏئي رهيو آهي، ايم ڊي ڪيٽ ڪراچي، حيدرآباد، ڄامشورو، شهيد بينظير آباد، لاڙڪاڻو ۽ سکر ۾ هڪ ئي وقت ٿي رهي آهي.
