سکر (بيورو چيف) ٻارن کي تعليم جي فروغ تي زور ڏيو ۽ ٻارن کي ڪاپي ڪلچر جي لعنت کان ڇوٽڪارو ڏيارڻ لاءِ والدين کي اڳتي اچڻو پوندو. انهن خيالن جو اظهار ضلعي ڪائونسل جي چيئرمين سيد ڪميل حيدر شاهه پنهنجي آفيس ۾ ايندڙ سکر جي اين جي اوز جي وفد سان ڳالهائيندي ڪيو. سکر ڊولپمينٽ فورم جي جنرل باڊي جي چيئرمين شڪيل احمد لطيفي، جميل ايوب مهر، عبدالجبار شيخ، دلبر ميراني، اسد الله شيخ، غزاله انجم، غلام مصطفيٰ ميراني، طالب حسين مهر سميت ٻين آفيسرن ۽ ضلعي ڪائونسل جي نائب چيئرمين بئريسٽر اختر حسين مهر پڻ شريڪ هئا.سيد ڪميل حيدر شاهه وفد کي وڌيڪ چيو ته توهان اين جي اوز جي دوستن کان گهڻو سکيو آهي. اسان سڀني کي گڏجي نوجوانن جي ٽيلنٽ کي اجاگر ڪرڻو آهي ۽ ٻارن جي والدين کي آگاهي ڏيڻ ضروري آهي. ٻارن کي ڪاپي ڪلچر جهڙي لعنت کان ڇوٽڪارو ڏيارڻ تمام گهڻو ضروري ٿي پيو آهي. آخر ٻار تعليم کي وڌائڻ لاءِ پنهنجن پيرن تي ڪڏهن اچي سگهندا؟ ان دوران سيد ڪميل حيدر شاهه کي سکر ڊولپمينٽ فورم جي سرپرست اعليٰ بڻجڻ جي دعوت ڏني وئي، جنهن کي هن قبول ڪيو ۽ چيو ته اسان سڀ گڏجي شهر ۽ ڳوٺن ۾ مسئلن کي ترجيحي بنيادن تي حل ڪرڻ جي ڪوشش ڪنداسين.
