ڪراچي چيمبر آف ڪامرس اينڊ انڊسٽري (ڪي سي سي آءِ) سوئي سدرن گيس ڪمپني (ايس ايس جي سي) پاران گيس پائيپ لائينن جي تنصيب، تبديلي ۽ اپ گريڊيشن کان پوءِ روڊن جي بروقت بحالي نه ٿيڻ تي سخت ڳڻتي ظاهر ڪئي آهي.
بزنس مين گروپ جي چيئرمين زبير موتي والا ۽ ڪي سي سي آءِ جي صدر محمد ريحان حنيف وڏي وزير سنڌ سيد مراد علي شاهه کي خط لکي ذميوارن خلاف ڪارروائي ۽ متاثر روڊن جي فوري مرمت جو مطالبو ڪيو آهي.واپاري اڳواڻن چيو ته گئس جي بنيادي ڍانچي ۾ بهتري قابلِ تعريف آهي، پر ناقص منصوبابندي ۽ کوٽائي کان پوءِ روڊن جي بحالي ۾ دير شهرين ۽ ڪاروباري برادري لاءِ وڏيون تڪليفون پيدا ڪري رهي آهي.سندن موجب خراب روڊن سبب ٽريفڪ جام، سفر جو وقت ۽ ٽرانسپورٽ خرچ وڌي رهيا آهن، گاڏين کي نقصان پهچي رهيو آهي ۽ شهرين جي حفاظت به خطري ۾ آهي. ان صورتحال سبب واپاري ۽ صنعتي سرگرميون، سامان جي ترسيل ۽ ڪاروباري عمل متاثر ٿي رهيا آهن، جنهن جا ناڪاري اثر معيشت تي پڻ پئجي رهيا آهن
